Segja má að menntastefna sé umhverfisstefna Netsins. 

Með notkun Netsins í skólastarfi eru nemendur settir inn í hringiðu upplýsingaheims sem á köflum einkennist af ringulreið og miður hollu efni en sem í annan stað geymir dýrustu perlur menningarinnar.

​

Í þessum efnum er því mikilvægt að einstaklingar, fyrirtæki og stofnanir, sem eru að setja inn efni á Netið, hafi í huga að það er menntavöllur barna og ungmenna.

​

Með skýrt fram settum námsmarkmiðum í aðalnámskrám leikskóla, grunnskóla og framhaldsskóla gefst einstaklingum, stofnunum og fyrirtækjum í landinu kjörið tækifæri til að marka sér skýra stefnu í því hvernig þau haga framsetningu þess efnis sem sett er á Netið þannig að það nýtist við kennslu og til ræktunar mannauðs Íslendinga. 

​

Einn mikilvægasti eiginleiki upplýsinga- og samskiptatækni er að gera einstaklingnum mögulegt að fást við verkefni
sem án tækninnar væru eingöngu á færi sérfræðinga.
 

Upplýsingatækni eykur getu og færni líkt og ritmálið á sínum tíma. Eins og ritmálið jók við getu samfélagsins til að varðveita flókna þekkingu og miðla henni á milli kynslóða gerir upplýsingatæknin einstaklingnum mögulegt að varðveita og fást við flókna hluti sem hann hefði annars orðið að leita sér aðstoðar við.

Í Aðalnámskrá framhaldsskóla er lögð mikil áhersla á að notaður verði viðeigandi vél- og hugbúnaður í hverri námsgrein. Með þeim hætti kynnist nemandinn notagildi upplýsinga- og samskiptatækni á sem flestum sviðum og öðlast með því færni í að beita henni.













Heimildir:

Aðalnámsskrá framhaldsskóla, listir. 1999

Aðalnámsskrá grunnskóla, upplýsinga- og tæknimennt. 2007